Er os ròi deth Pirenèu

Er os ròi: simbèu dera natura o eth "termomètre mieiambientau"

Es detractors d’aguesta bèstia sauvatge se demanen sense escrúpols "Entà qué servissen es ossi?" o "Qué n’auem de trèir? ". Donques son ben utils: mos servissen de termomètre deth miei ambient de montanha. Eth hèt que i age ossi en bon estat de salut e damb bona reproduccion ei dirèctament proporcionau ath bon estat ambientau deth miei de montanha.

Per qué?:

Un os a de minjar benben entà mantier es 200 Kgs de pes e hèr eth sòn celh de grèish entara iuernacion: vegetaus, fruts deth bòsc, bestiòtes deth bòsc, reptils, insèctes, bèra oelha. Se i a ossi vò díder qu’era montanha encara ei capaça de generar aliments.

Es ossi, entà reprodusir-se, an de besonh fòrça tranquilitat. Quan era preséncia der òme lo enrède, es femelhes non apareishen. An de besonh fòrça km² de solitud. Se es ossi se reprodusissen ei era pròva qu’encara i a km² de natura sense preséncia umana, damb un estat de conservacion perfècte!

Es zònes de montanha a on i a ossi se nomenten zònes "5 estèles" perqué son zònes de nauta qualitat naturau, lèu perfèctes. Se es ossi non se reprodusissen, e era sua poblacion amendrís vò díder qu’er òme va ocupant e va des·hènt pòga pòc era montanha.

Er os ei eth bioindicador num 1: eth ei qui mos mèrque er estat mieiambientau

E non pas sonque per aguesta rason, senon perqué er òme non pòt hèr a desparéisher ua espècia qu’a existit e convescut tostemp damb eth. Com espècia qu’ei, a tot eth dret a víuer com era nòsta espècia. S’a de cercar metòdes e politiques entà que poguen convíuer es dues espècies. Non ei pas tan complicat.